好多人都覺得盂蘭節係一個好得人驚嘅節日，傳聞話農曆七月鬼門關大開，通街都係鬼；又有傳盂蘭勝會入面嘅神功戲，係做俾遊魂野鬼睇，第一場戲係凡人止步；戲棚第一行座位要留空，留番俾「老友記」坐………其實，呢啲傳聞係真係假，不如等由細細個開始，已經參與盂蘭勝會嘅西貢區潮僑街坊盂蘭勝會理事胡炎松話你知好過啦！一味以訛傳訛，唔驚都俾你嚇到驚！
文：阮芷慧 圖：鍾式明
鳴謝、部分相片提供：長春社文化古蹟資源中心、胡炎松先生(長春社文化古蹟資源中心理事及西貢區潮僑街坊盂蘭勝會理事)、西貢區潮僑街坊盂蘭勝會
喺破解盂蘭迷思前，先了解下盂蘭勝會嘅傳統。盂蘭勝會每年喺農曆七月舉行，一共三日，活動包括祭祀、燒紙錢、神功戲、派平安米、福品競投等。香港嘅盂蘭勝會通常喺公園或者球場舉行，主要有潮人(潮州)、鶴佬(海陸豐)同廣府三個唔同鄉下，內容大同小異。其中2011年，香港潮人盂蘭勝會更被列入第三批《國家級非物質文化遺產名錄》中。
傳統盂蘭勝會有戲棚，面向天地父母棚(又稱神棚)，喻意表演神功戲俾眾神欣賞。戲棚左方有經師棚，右方就有孤魂台、附薦台同大士台，大士台內有十呎高嘅大士爺(又稱鬼王)，用以鎮懾鬼魂。
編按：由於場地所限，每個盂蘭勝會嘅棚位擺放都會有啲唔同，但基本天地父母棚同戲棚都必須對正；而附圖中〔圖3 〕嘅資料圖片係來自香港唔同地區同鄉下嘅盂蘭勝會，以供參考。
六大迷思
迷思一: 盂蘭勝會入面嘅神功戲，係做俾遊魂野鬼睇，第一場戲係凡人止步？
解說：其實每日上演正場戲之前，的確有一齣長約半小時嘅《五福連》，不過係俾神睇，並非俾鬼睇。而且戲棚對正神棚，眾神就可以欣賞到神功戲喇。
迷思二: 戲棚第一行座位要留空，留番俾鬼坐？
解說：No！第一行冇人坐，係因為要預留俾鄉民代表、理事長、村長等嘅VIP坐，而佢哋又未必場場到場觀賞，久而久之，大家見第一行座位空咗出嚟，就誤傳為留俾鬼坐喇。
迷思三: 鬼都要供奉？
解說：供奉鬼同神同樣係積功德嘅表現，亦有消孽之意。
迷思四: 供奉儀式唔俾小朋友入去，係怕小朋友被鬼嚇親？
解說：其實係怕小朋友手多多亂咁摸，唔小心褻瀆神明，索性唔帶佢哋入去。
迷思五: 農曆七月鬼門關大開，通街都係鬼？
解說：盂蘭勝會第一日下午兩點左右，會有「發關儀式」，紙紮「值符使者」會帶一道俗稱「通行證」嘅關文被化到陰間，通知孤魂可到陽間參與勝會。由於每個地區舉行盂蘭勝會日子唔同，加上孤魂野鬼上到嚟會識去「孤魂台」受市民供奉同超度，所以佢哋唔會通街走，而且唔會成個農曆七月都通街鬼囉！
迷思六: 點解有儀式係要九十幾歲阿婆爬刀梯、走火炭路？
解說：唔同鄉下有唔同習俗，好似海陸豐信奉正一派，其中有參拜茅山師傅、齊天大聖等，儀式中有請神上身環節，搵九十幾歲阿婆爬刀梯、走火炭路，為展示刀槍不入。
相關資料
如果大家想更了解盂蘭勝會呢個傳統節日，可以參加長春社文化古蹟資源中心舉辦嘅「速寫 ． 香港潮人盂蘭勝會」活動。
詳情：http://cache.org.hk/blog/sketch_yu_lan或Facebook search長春社文化古蹟資源中心
