前荔園馴獸師 說茶果嶺動物故事 蘋果日報 2017/05/09
傳媒報導



前荔園馴獸師 說茶果嶺動物故事

 

假如有時光機,我好想返去60年代,睇吓由前荔園馴獸師蕭國威(威哥)當年在家中打造的茶果嶺動物奇觀。以為只得幾隻貓狗雀?原來有海狗有企鵝有金錢豹有棕熊等50種動物,勁過動植物公園!下月威哥與街坊將揸旗導賞這條城市鄉村,大家可以親身聽佢分享中熊掌和畀豹咬的驚險馴獸故事。

位處藍田與油塘之間的茶果嶺村有過百年歷史,高樓側有些矮樓房。村內最高大宅住了一位奇人,他叫蕭國威,年過七十,瘦削卻矯健,客氣又霸氣。「我係香港唯一馴獸師,喺荔園做了18年,曾經喺屋企養過金錢豹、熊、猴子、企鵝、海狗……」聽到呢度已覺不得了,屋企係動物園,猛獸係寵物,這個不思議事件源於他爸爸蕭雲厂(音:庵)開動物園的夢想。「當時漁農署畀咗個牌我哋,可以入口猛獸。我哋託不同馬戲團搵動物,包括日本矢野馬戲團幫我哋運來海狗及企鵝。」威哥18歲跟隨師傅沈常福學習馴服動物,21歲就滿師到澳門搵食。由於爸爸認識荔園老闆邱德根,因緣際會,他為樂園打理後來成為港人集體回憶的荔園動物園,動物明星包括大象「天奴」。威哥說:「猛獸來到,唔可以直接放出去畀觀眾睇,佢會撲籠,鼻都撞爛,馴服咗先可以運到荔園,所以有啲猛獸要放喺屋企住。」

 

 

威哥的家居「雲臺」位處村中最高位置,導賞團將會帶大家參觀。

「呢度擺金錢豹籠,側邊養熊。」他說遺憾當年沒有為大部份動物拍照。

 

走在茶果嶺大街,威哥說這為「羅氏大屋」(後人已遷出),此精妙趟門有過百年歷史。

 

 

被棕熊一掌打到飛起

因為地利,動物直送家中相當方便,但驚險事一籮籮。「以前茶果嶺側邊係海,動物用俗稱『大眼雞』嘅木船運來,大象都喺呢度上岸。曾經有隻棕熊本身用木籠困住,我哋養要轉鐵籠,過籠期間佢跑咗出來。當時好多街坊圍觀,分分鐘咬死人。師傅教落要喺佢側邊騎着佢,捉住佢兩隻耳仔,點知佢一掌打過來,嗰掌應該有500磅力,我飛到好遠,當堂吐血,唔係講笑。但當時情形你無得停,又立即跑去捉住佢,加埋幾個人夾手夾腳先令佢走番入鐵籠。」佢重演當日情況,繪形繪聲,我聽都覺得驚,佢仲話如果熊掌正面來襲,肯定命都無。猛獸經他馴服過後都會乖乖聽話,所以同住一大宅都無問題。「動物有性的,你馴服了佢,佢會對你忠心,唔會奸詐,唔似得人。」
回想在家養過的動物,好像需在極冷氣候生活的企鵝與海狗,他提起即十分雀躍。「海狗池挖到好深,有部冷氣長期吹住佢,每日喺對面海牛奶公司冰廠運塊冰來畀佢伏喺上面,佢識拍手掌。另外一對企鵝就喺呢度住咗7年,我吹口琴,佢會跳舞!」
威哥對茶果嶺歷史瞭如指掌,當日跟着他穿梭村中,幾乎一步一故事,我好想講句:「我真係學咗好多嘢呀!」

威哥於荔園擔任馴獸師至42歲退休。
威哥當年任馴獸師,眼神銳利,兇殘的金錢豹都要乖乖聽話。
搗蛋的威哥(右二)當年曾拖黑熊去看粵劇,嚇到觀眾四散。
大象「天奴」都是由威哥馴服,他說天奴每日要吃一船甘蔗及大量香蕉。
香港醬油品牌左顯記以企鵝為商標,70年代曾向威哥借企鵝到工展會站台,引來市民圍觀。(左顯記廣告截圖)

賽馬會世代共融社區文化遺產計劃──茶果嶺地膽口述歷史團

http://cache.org.hk/blog/ckl_ohjun017/

日期:6月24日(星期六)
時間:2:30pm-5pm
地點:茶果嶺村
名額:20人
費用︰$140
查詢:22910238

記者:葉青霞
攝影:張志孟(部份圖片由受訪者提供)
編輯:英穎欣
美術:楊永昌 

Share via email

Leave a Reply

Your email address will not be published. Required fields are marked *

*

* Copy this password:

* Type or paste password here:

41,730 Spam Comments Blocked so far by Spam Free Wordpress