周星馳電影《少林足球》裡有句話︰「做人如果冇夢想，同條鹹魚有咩分別？」
不過，現實的香港，連鹹魚也快消失。
香港開埠前已有人製作鹹魚，開埠後，西環鄰近魚類批發市場，鹹魚欄開得鋪天蓋地，德輔道西更有一條「鹹魚街」（現已易名為「海味街」）。
鹹魚白菜的年代，曾經是獅子山下香港人奮鬥的故事，但隨着社會變遷，鹹魚業幾已絕跡。
區振鵬，香港鹹魚進興商會主席，正參與為期兩個月「城西魚香──鹹魚欄的故事」的展覽。
他慨嘆香港沒有新一代願意入行，道出這古老行業的輓歌。
我五十歲，成世人，都跟鹹魚有關。
我阿爸五十年代由中山來港，在西環跟人學曬鹹魚，學滿師就自己開鋪。
攞魚、醃魚、曬魚、批發、零售，一腳踢。上一輩的人，都很勤力。
我十八歲中學畢業，老豆叫我在鹹魚欄幫手。曬鹹魚，一靠天，二靠勤力。
師傅要無時無刻留意天氣變化，一有機會落雨，就要在天台「按鐘」，全部人即刻衝上天台，用帆布冚住鹹魚，好似走火警，雨季時，一日走五、六次。
曬鹹魚要時時刻刻睇實，所以做這行沒有假期。嗰陣我後生仔一個，班朋友約出去玩，我永遠去唔到，我覺得無自由，又周身鹹魚味，做了三年，頂唔順，轉行。
我走去做懲教署，自由好多，一星期一日例假，幾個月一次大假，政府工當然舒服。
做了三年，父親身體逐漸變差，母親開始慨嘆，屋企人話如果我唔返去幫手，辛辛苦苦經營的家族生意就沒有了。
我終於被說服回家幫手，一做就做了幾十年。
六、七十年代，阿爸一早有遠見，走去越南、孟加拉及泰國的漁村投資鹹魚場，又派師傅到當地教人做鹹魚，再運回香港。
那些年，家家戶戶都食鹹魚，當時大陸又未開放，好多人都帶十幾斤鹹魚返鄉下派。當時上面無嘢食，鹽票難求，一條鹹魚已可補充足夠鹽分。
到了八十年代，香港社會講衞生，政府要求我們申領「食物製造廠牌」才可曬鹹魚。啲人話鹹魚洗魚的水好腥好臭，市區居民密集，天天有人投訴。
到了九十年代，鋪天蓋地話食鹹魚會生 cancer，一下子生意插水，鹹魚跌價五成。
鹹魚供求大減，鹹魚業前景暗淡。我曾經好努力振奮呢一行業，想叫班後生仔入行，我仔女唔願意，行家亦一間一間收檔結業。六年前，我見就算我留住鹹魚牌都沒用，根本無人肯做，於是還番俾政府，是西環最後一個。
而家，我淨係從外地入口做批發零售，已經沒有「香港製造」的鹹魚。
有時，我會走去大澳，當地漁民會在家裡曬幾條鹹魚，我聞住飄來的那股熟悉鹹魚香，便想起以前的夢。
撰文：陳剛
攝影：黃晴
