沙田友帶團賞公屋 重遊周潤發拍戲被撞飛之地

愛這個城市，有人用腳，他加多把聲，還有一個隨身擴音器。9月重返校園，志願做社工，但其實，他讀歷史出身，專門研究公屋發展。由他設計路線的「公屋一日遊」，沿途暴曬無「鳩嗚」，卻大受歡迎。由拍過經典劇集《小時候》的瀝源邨，走到影星周潤發在《賭神》中被撞到飛起的「娛樂城」；由2元一個街坊小店菠蘿包到愛心麵店，80後公屋達人李緯邦說：「社區規劃得好，先可凝聚真正嘅歸屬感。」
記者：呂麗嬋

逾30度高溫，艷陽下街道熱得像着了火，走了個多小時，導賞員阿邦汗流浹背。周六大清早，一行20人，跟着他走了小半個沙田。穿過被指「淪陷了」的新城市廣場後，像走進時光機，國際品牌消失了，連着工場的麵包舖，有新鮮出爐的車輪包、居民聚腳的大圓形噴水池，還有涼風送爽的天井。只十分鐘腳程，如回到1975年。「瀝源邨喺呢年建成，呢度有我好多美好回憶。」

訪愛心麵店感受街坊情

導賞團叫「我們這一代沙田友」，由長春社文化古蹟資源中心舉辦，團友來自四方八面。有家住天水圍的演藝學院女學生、有關心保育的大學職員、有龍友公務員，也有陪伴中風康復媽媽到來的孝順女，「細個住公屋，姨媽又住呢條邨，年年嚟拜年，但從來唔知呢度原來有咁多有趣嘅歷史。」近在眼前，反忘了細味，大抵是都市人的通病。

「了解過去，先可預測未來，係讀歷史嘅意義。」對一草一木充滿好奇，中大歷史系畢業的阿邦，畢業論文寫他熟悉的沙田，「好多人覺得宋元明清先係歷史，其實歷史可以好貼身。」70年代，沙田是「十年建屋計劃」下的新市鎮，「設計概念係自給自足，街市、巴士站同圖書館，一應俱全。」翻查房署年報，透過規劃文件，讓他對成長的社區認識更深。「參考文獻唔多，落區訪談更重要。」

1956年開店、放滿藝術擺設的老麵家盛記，就讓他留下不少腳毛。「B哥係沙田通，嗰時唔識佢，日日坐喺最近水吧嗰張枱，一有機會就搭訕。」外形cool爆的B哥，原來熱情如火，一杯啤酒下肚，無所不談。「除咗B哥嘅故事，街坊又會主動提供老照片。」小社區的街坊情，就係咁簡單。
這天，阿邦又帶團來到盛記，遇正B哥80歲的媽媽返潮州探親，休業一天，但熱情的B哥不單開門讓團友參觀，還下廚煮了兩大盆風味小炒萬歲。中秋將至，B哥又乘機向團友推銷「食剩月餅唔好嘥」義舉，原來他與深水埗明哥合作，回收月餅送給有需要的人，「牛頭角邨已清拆，預咗呢度都會步牛下後塵，但可以做，我仍然會做落去。」B哥感性的說。離開盛記，轉過彎，來到漢和麵包。

「有責任令學生了解更多」

「中學生無咩錢，呢間麵包舖，當年1蚊一個叉燒包，拯救咗好多貧苦學生。」阿邦說。半世紀麵包店經歷三代，當連鎖餅店賣到7元一個「發水麵包」，這裏的菠蘿包，盛惠2元。談談笑笑，都是麵包價格大比拼的瑣碎話題，「最初辦學生團，遇過港島區嘅學生，話從未見過雙塔式公屋，我覺得有責任令佢哋了解更多。」

父親做染廠經理，對上有個家姐，出身小康、少時住沙田第一城的阿邦，從小至大住私樓，卻與公屋結下不解緣，「我讀屋邨中學，同學都住附近，試過屈蛇住瀝源邨，又成日去上禾輋嘅鐵皮屋玩。」難忘農曆年逐家逐戶拍門的舞獅隊，也遇過石油汽爐未熄、拿着鐵鎚破門而入的場面，較消防員更早到達的赤膊街坊猛男，「那種守望相助嘅人情味，好羨慕。」念念不忘，必有迴響，大學研究公屋發展，畢業後自薦搞導賞公屋團，將象牙塔內的研究，以活潑方式帶進社區。

「最初同學校合作，後來擴展至公眾，印象最深係有個住過瀝源邨嘅團友，話發哥喺娛樂城拍《賭神》時，親眼見住佢俾架車撞到飛起。」自此，每次導賞，他都會講這個小故事。今年9月，他重返校園，轉讀社工，但再忙也堅持帶團，「好多人或者覺得，公屋有咩好睇，但我希望，導賞只係個起點，大家可以另一角度欣賞身邊事物。」

當年簡陋單位　今變奢侈品