November 22nd, 2016

神雕半世紀　化木頭為神像

「雕得好就係功德，雕得唔好就係罪孽。」雕刻大師對於每個deal都一絲不苟，尤其當你接的不是普通deal，是神deal。化木頭為神像逾半世紀的蕭炳強師傅，不論是赫赫有名的神明，抑或寂寂無聞的水上人家神，他都力求完美，計較毫釐。這項香港非物質文化遺產現只剩這位做神者獨力撐着，名副其實的「神級」技藝，有有緣人希望傳承嗎？

蕭師傅的雕刻工場「滿天神佛」，關公、笑佛、呂祖、觀音等等，排排企或坐在層板，上了色的，原木色的，有如開緊跨宗教party。我問：「唔怕衝突？」他謂：「好多年前，我連聖母像都雕過。」然後他笑指自己把聖母雕得有點像中國人，唔多滿意。師傅本身篤信道教，皈依青松觀。「青松觀係全真教，全真教都拜三教㗎，三教即係儒釋道，有孔夫子，仲有釋迦牟尼，冇衝突嘅。」

水上人問米決定造型

師傅對道教熟悉不足為奇，為了雕出神髓，他也博覽佛家經書，講起這門手藝，經常笑咪咪的他肯定樂業，也絕對敬業。師傅接受客人委託訂做神像，也會做好一些放於工場，讓客人到來選走合眼緣的。可是部份造型幾可愛的木頭公仔，有些穿西裝的，有些踩龍騎鶴的，到底又是甚麼？「佢哋係水上人家神，同我哋供奉先人神主牌一樣。舊時啲水上人都唔做神主牌，因為佢哋文化水平比較低，唔係好識字，放神主牌，幾十個，佢哋都分唔到邊個打邊個，於是佢哋就搵人做呢啲神像。」原來神像公仔按輩份造成不同大小，年長的會坐，壯年的會站，還有分男女。至於造型則取決於問米結果，例如先人「透過」問米婆表達想穿西裝，後人就會託人做西裝打扮的公仔。

頭戴清朝官帽造型的是大路之選，坐着的通常為50歲以上的長者。

50至90年代水上人多做先人公仔，現在部份水上人仍堅守傳統，不過已逐漸褪色。（相片由收藏家許日彤提供）

有殖民地色彩的英式打扮，是水上人先人公仔的另類選擇。

早年父子檔密密雕

蕭師傅八歲跟爸爸蕭汝昌學雕神像，他說當年「公仔舖」本在新填地街，皆因那時還未填海，尚有很多水上人居於住家艇，是主要客源。「兩個人一日可做三十幾個公仔。」兩父子密密雕，皆因若船上有人過身，水上人會認為家神被污染，便為先人換新公仔。師傅提到70年代初，他們更做過紅衞兵公仔。「嗰陣文革，有啲紅衞兵裝束嘅屍體沿着珠江飄流落嚟，水上人撈到，就請爸爸做紅衞兵公仔，喺船上供奉埋佢哋。」
工多藝熟的蕭師傅輕輕鬆鬆就為無面公仔雕出輪廓，再用手掃漆上色。不論雕刻或復修神像他都落足力，例如被白蟻蛀蝕嚴重的青山寺千手觀音，經搶救後回復光鮮，相信除擁有巧手，還因有崇敬，做功德之心。